नांदेड| जवाहर नवोदय विद्यालय प्रवेश चाचणी परीक्षा शनिवार 30 एप्रिल 2022 रोजी सकाळी 10.30 ते दुपारी 1.30 यावेळेत नांदेड जिल्ह्यातील 31 केंद्रावर घेण्यात येणार आहे. याअनुषंगाने जिल्हा दंडाधिकारी डॉ. विपीन इटनकर यांनी फौजदारी प्रक्रिया संहिता 1973 चे कलम 144 अन्वये आदेश निर्गमीत केले आहेत.
जिल्ह्यातील या 31 परीक्षा केंद्रावर नवोदय चाचणी परीक्षा चालू असतांना परीक्षेच्या कामाशी संबंधित असलेले अधिकारी-कर्मचारी या व्यतिरीक्त इतर कोणत्याही व्यक्तीस परीक्षा केंद्रापासून 100 मीटर परिसरात प्रवेश करता येणार नाही. या कालावधीत सकाळी 8.30 ते दुपारी 3.30 यावेळेत परीक्षा केंद्र परिसरातील 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वनी, फॅक्स, झेरॉक्स आणि ध्वनीक्षेपक चालू ठेवण्यास प्रतिबंध करण्यात आले आहे.
महाराष्ट्र राजपत्रित तांत्रिक सेवा पूर्व परीक्षा केंद्र परिसरात प्रतिबंधात्मक आदेश
महाराष्ट्र राजपत्रित तांत्रिक सेवा पूर्व परीक्षा 2021 नांदेड जिल्ह्यातील 15 परीक्षा केंद्रावर शनिवार 30 एप्रिल 2022 रोजी घेण्यात येणार आहे. या परीक्षा केंद्र परिसरात प्रतिबंधात्मक आदेश लागू केल्याचे जिल्हादंडाधिकारी डॉ. विपीन इटनकर यांनी कळवले आहे.
नांदेड जिल्ह्यातील विविध 15 शाळा-महाविद्यालयातील केंद्रावर सकाळी 11 ते दुपारी 12 या कालावधीत परीक्षा होणार आहे. या परीक्षेसाठी 3 हजार 863 उमेदवारांनी नोंदणी केली आहे. परीक्षेचे कामकाज सुरळीत व शांततेत पार पडावे यासाठी परीक्षा केंद्राच्या 100 मीटर परिसरातील फौजदारी प्रक्रिया संहिता 1973 च्या कलम 144 अन्वये प्रतिबंधात्मक आदेश लागू करण्यात आले आहेत.
त्यानुसार परीक्षेच्या दिवशी सकाळी 9 ते दुपारी 2 वाजेपर्यंतच्या कालावधीत परीक्षार्थी व परीक्षेच्या कामाशी संबंधित असलेले अधिकारी-कर्मचारी यांच्या व्यतिरिक्त इतर कोणत्याही व्यक्तीस प्रवेश करता येणार नाही. तसेच यावेळेत केंद्राच्या परिसरातील 100 मीटर पर्यंतची सर्व सार्वजनिक टेलिफोन्स, एसटीडी, आयएसडी, भ्रमणध्वनी, फॅक्स, झेरॉक्स आणि ध्वनिक्षेपक चालू ठेवण्यास प्रतिबंध करण्यात येत आहे, असे जिल्हादंडाधिकारी नांदेड यांनी आदेशात नमूद केले आहे.
