हिमायतनगर, अनिल मादसवार| येथील बहुचर्चित असलेल्या विविध कार्यकारी सेवा सहकारी सोसायटीच्या सार्वत्रिक निवडणूकीची रणधुमाळी अंतिम टप्प्यात आली उद्या दि २९ जानेवारी रोजी या निवडणुकीसाठी येथील जिल्हा परिषद हायस्कुल येथील मतदान केंद्रावर मतदान होणार असून, त्यानंतर लागलीच मतमोजणी होऊन निकाल जाहीर केला जाणार आहे. अशी माहिती तालुका सहकारी निवडणूक अधिकारी तथा सहाय्यक निबंधक सहकारी संस्था श्री एल.टी.डावरे यांनी नांदेड न्यूज लाईव्हशी बोलताना दिली.
हिमायतनगर सेवा सहकारी सोसायटीच्या मतदार संघ १३ जागेसाठी निवडणूक दि.२९ जानेवारीला म्हणजे उदयाला होणार असून, यात एकूण ११०९ सभासद (मतदार) मतदानाचा हक्क बजावणार आहेत. निवडणूक कार्यक्रमाला सुरुवात झाल्यापासून शिवसेना- काँग्रेस या दोन्ही पक्षाच्या नेत्यांनी आपली प्रतिष्ठा पणाला लावत उमेदवारांची निवड करून नामनिर्देशन दाखल केले. या सर्व उमेदरवाना निशाणी वाटप झाल्यानंतर प्रचाराला सुरुवात झाली. दरम्यान प्रथम प्रचारात काँग्रेस पक्षाने आघडी घेऊन ध्वनिप्रक्षेपणाद्वारे प्रचाराला सुरुवात केली. त्यानंतर शिवसेना प्रणित पैनलने देखील प्रचारात मुसंडी मारत रात्रंदिवस एक करून मतदारांच्या भेटी घेऊन निवडणुकीत रंगत भरली
हिमायतनगर येथील विविध कार्यकारी सेवा सहकारी सोसायटी निवडणुकीत १३ सदस्य असल्याने यासाठी २६ उमेदवार रिंगणात आहेत. या निवडणुकीत सर्वसाधारण सदस्य ८, अनुसूचित जाती -जमाती १ सदस्य, महिला प्रतिनिधी २ सदस्य, इतर मागासवर्गीय प्रतिनिधी १, भटक्या विमुक्त जाती जमाती व विशेष मागास प्रवर्ग प्रतिनिधी १ या जागांसाठी उमेदवार निवडणूक रिंगणात आहेत.
जसेजसे निवंडनुकीचे दिवस जवळ येऊ लागले तसा प्रचाराला वेग आला होता. शेवटच्या दोन दिवसात तर थंडीची तमा न बाळगता सकाळी ६ वाजल्यापासून शिवसेना व काँग्रेसच्या उमेदवारांनी मतदारांचे उंबरठे झिजविले आणि प्रचार रैली काढून आमच्या पक्षाच्या उमेदवाराला निवडून द्यावं असे आवाहन केले. आज रात्रीला म्हणजे शुक्रवारी मतदानाच्या पूर्वसंध्येला जो पक्ष रणनीती आखून मतदारांना आपलंसे करेल त्या पक्षाच्या पैनलचा वरचष्मा राहील असे चित्र सध्यातरी दिसते आहे. एकूणच सोसायटीची निवडणूक म्हणजे आगामी जिल्हा परिषद, पंचायत समिती, नगरपंचायत निवडणुकीची रंगीत तालीम आहे. त्यामुळे या सोसायटीच्या निवडणुकीत आपल्या पक्षाचा वरचष्मा राहावा म्हणून शिवसेनेचे माजी आ. नागेश पाटील आष्टीकर आणि काँग्रेसचे विद्यमान आ. माधवराव पाटील जवळगावकर यांनी हि निवडणूक प्रतिष्ठेची केली आहे. त्यामुळे यापैकी कोणाचा प्रयत्नांना यश मिळून कोणता पक्ष बाजी मारेल हे उद्या सायंकाळी ७ वाजेपर्यंत स्पष्ठ होणार आहे.
या निवडणुकीसाठी प्रत्यक्ष मतदान दि. २९ जानेवारीला सकाळी ८ ते ४ पर्यंत हिमायतनगर शहरातील पाण्याच्या टाकीकडे असलेल्या जिल्हा परिषद हायस्कुलच्या मतदान केंदारवर होणार आहे तर लागलीच सायंकाळी ५ वाजता मतमोजणी होऊन पदाधिकारी निकाल आणि निवड लगेचच केली जाईल. दरम्यान मतदारांनी मतदान करण्यासाठी येताना आपले ओळखपत्र, आधारकार्ड, रेशन आदींसह इतर ओळख आलेले पुरावे सोबत आणणे आवश्यक असल्याचे तालुका सहकारी निवडणूक अधिकारी तथा सहाय्यक निबंधक सहकारी संस्था श्री एल.टी.डावरे यांनी नांदेड न्यूज लाईव्हशी बोलताना दिली आहे.
