नांदेडचे नागापूरकर, विष्णुपूरीकर, चौधरी यांचा राज्यपालांच्या हस्ते पुरस्कार देवून गौरव
मुंबई| चांगल्या कामाच्या प्रसिद्धीतून प्रोत्साहन मिळते त्यामुळे पत्रकारांनी समाजातील दोष, उणिवा शोधत असतांना चांगल्या कार्याला प्रसिद्धी देवून सकारात्मकता निर्माण करावी, असे आवाहन राज्यपाल भगतसिंग कोश्यारी यांनी महाराष्ट्र गामीण पत्रकार संघाच्या पुरस्कार वितरण सोहळ्यात बोलतांना केले.
महाराष्ट्र ग्रामीण पत्रकार संघाच्यावतीने दिले जाणारा यशवंतराव पाध्ये उत्कृष्ट पत्रकार पुरस्कार यंदा सायं दैनिक नांदेड वार्ता चे मुख्य संपादक प्रदीप नागापूरकर यांना तर पत्रकार भूषण, मंगेश देशपांडे, चारुदत्त चौधरी, नंदकीशोर तोष्णीवाल, राहुल क्षीरसागर, अजित मांडके, उमेश तरे यांना पत्रकार भूषण तर नांदेड एकजुटचे संपादक डी.पी. विष्णुपुरीकर यांचा राज्यपालांच्या हस्ते विशेष सत्कार करण्यात आला. समाज भूषण शरद यशवंत अंबेकर, जीवन गौरव भगवानराव देशमुख, आदर्श प्रशासक पुरस्कार अलिबागच्या उप जिल्हाधिकारी पद्मश्री एस. बैनाडे तसेच ठाणे महापालिकेच्या उपायुक्त कल्पिता किशोर पिंपळे, भुसावळचे सहाय्यक पोलीस उपनिरिक्षक भाऊसाहेब मगरे, साहित्यरत्न व्यंकटेश काटकर, डॉ.हंसराज वैद्य यांना तर उद्योग श्री पुरस्कार ठाणेचे तरुण उद्योजक मल्सुरे यांना राज्यपाल भगतसिंह कोश्यारी यांच्या हस्ते राजभवन येथे प्रदान करण्यात आला.
यावेळी बोलतांना राज्यपाल म्हणाले की, राजकारण आणि प्रशासन व्यवस्थेतील उणिवा व दोष दाखवणे हे पत्रकारांचे काम महत्वपूर्ण आहे. त्याचसोबत समाजात चांगले कार्य करणार्यांचे कौतुक केले तर त्यांना प्रोत्साहन मिळून अधिकची चांगली कामे होतील, असा विश्वास त्यांनी यावेळी बोलतांना व्यक्त केला. यावेळी ठाण्याचे आ.संजय केळकर, महाराष्ट्र ग्रामीण पत्रकार संघाचे अध्यक्ष एकनाथ बिरवटकर, उपाध्यक्ष शंकर रहाणे, सचिव श्रीकांत चाळके, महाराष्ट्र संपादक परिषदेचे श्री धोंडोपंत विष्णूपूरीकर व विविध पुरस्कारांचे मानकरी उपस्थित होते.
