पोलीस यंत्रणेच्या विरोधात प्रचंड घोषणाबाजी करुन नागरिकांनी तब्बल चाळीस मिनिटे अंत्ययात्रा थांबवली -NNL

हत्येची सुपारी देणाऱ्यांना अगोदर पकडा.. ती कितीही मोठा माणूस असो...बियाणीच्या कुटुंबाची मागणी 

नांदेड| नांदेड येथील प्रसिद्ध बांधकाम व्यावसायिक संजय बियाणी यांच्यावर आज दुपारी गोवर्धनघाट स्मशानभूमीत शोकाकुल वातावरणात अंत्यसंस्कार करण्यात आले. जिल्हा पोलीस अधीक्षक कार्यालयासमोर अंत्ययात्रा येताच प्रक्षुब्ध नागरिकांनी व कोलंबीच्या गावकऱ्यानी पोलीस यंत्रणेच्या विरोधात प्रचंड घोषणाबाजी करुन तब्बल चाळीस मिनिटे अंत्ययात्रा थांबवली. त्यामुळे काहीकाळ तणावाचे वातावरण निर्माण झाले होते.

नांदेड येथील प्रख्यात बांधकाम व्यावसायिक संजय बियाणी यांची काल सकाळी ११ वाजता अज्ञात सराईत असलेल्या आरोपींनी दिड मिनिटात गोळ्या झाडून त्यांची हत्या केली. या हत्येमुळे सबंध नांदेड शहर व जिल्ह्यात संताप व्यक्त करण्यात आला. आनंदनगर भागात अनेक दुकानावर दगडफेक झाली. त्यानंतर शहरातील दुकाने बंद झाली. त्यांचे शवविच्छेदन झाल्यानंतर त्यांचा मृतदेह कुटुंबियांकडे सोपविण्यात आला. काल सायंकाळपासून ते आज अकरा वाजेपर्यंत त्यांचे अंत्यदर्शन घेण्यासाठी त्यांच्या निवासस्थानी प्रचंड गर्दी झाली होती. कोलंबी गावचे ते रहिवाशी असल्याने गावकऱ्यानी टाहो फोडला. घरासमोरच गावकऱ्यानी पोलीस यंत्रणेच्या विरोधात प्रचंड घोषणाबाजी सुरु ठेवली. पालकमंत्री अशोक चव्हाण येईपर्यंत ही घोषणाबाजी सुरुच होती. 

आज सकाळी ११.३० वाजता त्यांच्या अंत्ययात्रेला प्रारंभ झाला. आज नांदेड शहर पूर्णतः कडकडीत बंद होते. अत्यंत मनमिळावू आणि सर्वांशी चांगले वागणारे अशी त्यांची ख्याती असल्याने तसेच सर्वच राजकीय पक्षांशी त्यांचे संबंध चांगले असल्याने त्यांच्या मृत्यूने सर्वच जण हळहळले. जवळपास आठ हजार लोकांना रोजगार त्यांच्यामुळे उपलब्ध झाला होता. किफायतशीर दरात मिळणारी घरे तसेच बिओटी तत्वावर त्यांनी केलेले बांधकाम तसेच पाडव्याला सुरु झालेल्या वेगवेगळ्या योजना यामुळे सर्वांनीच त्यांचे कौतूक केले होते. मात्र दृष्ट लागावी की काय..? अशा परिस्थितीत त्यांची हत्या झाली. अंत्ययात्रा पोलीस अधीक्षक कार्यालयासमोर रोखली.

आज सकाळपासूनच सर्वच रस्त्यावर त्यांच्या अंत्यदर्शनासाठी भरउन्हात लोक थांबले होते. अंत्ययात्रा जिल्हा पोलीस अधीक्षक कार्यालयासमोर आल्यानंतर प्रक्षुब्ध जमावाने जवळपास अर्धातास घोषणाबाजी करुन पोलीस यंत्रणेच्या विरोधात आपला संताप व्यक्त केला. हल्लेखोरांना फाशी झालीच पाहिजे, पोलीस प्रशासन हायहाय अशा घोषणा दिल्या. वरिष्ठ पोलीस अधिकाऱ्यानी समोर येवून आश्वासन दिल्याशिवाय अंत्ययात्रा पुढे जाणार नाही, असा पावित्रा अंत्ययात्रेतील नागरिक व गावकऱ्यांनी घेतला. त्यानंतर अतिरिक्त पोलीस अधीक्षक निलेश मोरे यांनी या प्रकरणातील आरोपी लवकरात लवकर अटक करुन कुणाचाही दबाव सहन न करता आरोपींना जास्तीत जास्त शिक्षा करण्याचा प्रयत्न आम्ही युध्दपातळीवर करत आहोत, तुमचे सहकार्य मिळाले तर निश्चितच आरोपी अटक होतील, असा विश्वास व्यक्त करुन त्यांना आश्वसत केले. त्यानंतर अंत्ययात्रा मार्गस्थ झाली. 

गोवर्धनघाट स्मशानभूमीत त्यांच्यावर अंत्यसंस्कार करण्यात आले. यावेळी पालकमंत्री अशोक चव्हाण, खासदार प्रतापराव पाटील चिखलीकर, आमदार बालाजी कल्याणकर, महापौर जयश्री पावडे, स्थायी समिती सभापती किशोर स्वामी तसेच जिल्ह्यातील विविध राजकीय पक्षाचे प्रतिनिधी, व्यापारी, कंत्राटदार उपस्थित होते.

संजय बियाणी यांच्या पत्नीचा पोलिसांवर रोष - संजय बियाणी हे दानशूर व्यक्तीमत्व होते. त्यांची निर्दयीपणे झालेली हत्या ही धक्कादायक असून, नांदेडच्या इतिहासात असे कधीच घडले नव्हते. बियाणी यांच्या कुटुंबियांनी केलेल्या मागणीनुसार निश्चितच या घटनेचा तपास अतिशय बारकाईने केला जाईल, अशी ग्वाही काँग्रेसचे ज्येष्ठ नेते पालकमंत्री अशोक चव्हाण यांनी माध्यमांशी बोलताना दिली.

नांदेड येथे बांधकाम व्यावसायिक संजय बियाणी यांची मंगळवारी हत्या झाली. आज बियाणी यांच्या पार्थिवाचे दर्शन घेण्यासाठी आणि परिवाराचे सांत्वन करण्यासाठी मंत्री चव्हाण हे बियाणींच्या निवासस्थानी आले होते. त्यावेळी त्यांनी माध्यमांशी संवाद साधताना गुन्हेगारांना तातडीने पकडण्यासाठी पोलीस अधिकाऱ्याची बैठक घेणार असल्याचे नमुद केले. मंत्री चव्हाण म्हणाले की, गेल्या आठ दिवसांपूर्वी मी त्यांच्या कार्यक्रमाला गेलो होतो. अतिशय शांत व मनमिळावू स्वभावाचा संजय होता. त्यांच्या हत्येचा तपास हा वेगाने होईल याची ग्वाही देतो. दरम्यान नांदेडच्या कायदा व सुव्यवस्थेचा प्रश्न निर्माण करणारी ही घटना असल्याची खंत देखील मंत्री अशोक चव्हाण यांनी व्यक्त केली. दरम्यान संजय बियाणी यांच्या निवासस्थाना समोर आज नागरिकांनी मोठी गर्दी करत पोलीस प्रशासनाच्या विरोधात घोषणाबाजी केली. हत्या करणाऱ्या आरोपींना तातडीने पकडा अशी मागणी यावेळी नागरिकांनी केली. तसेच व्यापारी संघटनांनी नांदेड कडकडीत बंद ठेवत हल्ल्याचा निषेध नोंदविला आहे.

बियाणींच्या पत्नीचा आक्रोश - संजय बियाणी यांच्यावर आज अंत्यसंस्कार करण्यात आले. त्यांच्या पत्नीने केलेला आक्रोशानंतर सर्वच उपस्थित हळहळले. दरम्यान बियाणींच्या पत्नीने कायदा व सुव्यवस्थेवर थेट आरोप करत पोलिसांच्या कार्यपध्दतीवर प्रश्नचिन्ह निर्माण केला आहे. तसेच अगोदर हत्येची सुपर देणाऱ्या त्या हुकूमच्या एक्क्याला पकडा आणि त्या आरोपीं शासन करा, अन्यथा या हत्येच्या घटनेच्या चौकशीसाठी मुंबई, दिल्ली पर्यंत जाईल असे त्यांनी माध्यमांना सांगितले.