नांदेड, अनिल मादसवार| नांदेड रेल्वे डीव्हिजन हे दक्षिण मध्य रेल्वेला जोडले असल्यामुळे रेल्वे बाबत विकासाच्या आणि प्रवाशांच्या दृष्टीने अनेक प्रश्न निर्माण होत आहेत. त्यामुळे मराठवाड्यातील रेल्वे प्रश्न मार्गी लावण्यासाठी नांदेड रेल्वे दिव्हिजनला दक्षिण मध्य रेल्वेतुन काढून मध्य रेल्वेशी जोडावे अशी मागणी भाजपचे खा.प्रतापराव पाटील चिखलीकर यांनी आज संसदेच्या हिवाळी अधिवेशनात केली. या प्रश्नावर चर्चा घडवून आणली.
खासदार झाल्या पासून प्रतापराव पाटील चिखलीकर यांनी नांदेड सह मराठवाड्यातील रेल्वे प्रश्न सोडून घेण्यासाठी कृतिशील राहिले आहेत. निवडून आल्यानंतर अवघ्या काही दिवसातच त्यांनी नांदेड बिदर रेल्वे मार्गाच्या प्रश्न मार्गी लावला. या मार्गाला मान्यता मिळवून घेतली. पिंक बुक मध्ये आर्थिक तरतूद करून घेतली. त्यानंतर मान्यता मिलेल्या नांदेड - बीदर मार्गाच्या प्रत्यक्ष कामाला सुरुवात करावी अशी मागणी करून हा प्रश्नही त्यांनी केंद्रीय रेल्वे मंत्री आणि रेल्वे विभागाकडे लाऊन धरला आहे. नांदेड आणि मराठवाड्यातील रेल्वे प्रवाशांना चांगली सेवा मिळाली. प्रवाशांना कोणत्याही अडचणी येऊ नयेत. या भागात अधिकाधिक रेल्वे सेवा उपलब्ध व्हाव्यात यासाठी खा. प्रतापराव पाटील चिखलीकर यांनी सातत्याने प्रयत्न सुरूच ठेवले आहेत.
संसदेच्या हिवाळी अधिवेशनात कलम 377अन्वये चर्चेच्या सत्रात खा. प्रतापराव पाटील चिखलीकर यांनी नांदेड रेल्वे दव्हिजनचा प्रश्न उचलून धरला. नांदेड हा महाराष्ट्राचा भाग आहे त्यामुळे इथली भाषा ही दक्षिण भारतापेक्षा भिन्न आहे. त्यामुळे आणि नांदेडचा मुंबईशी असलेला संपर्क व संबंध पाहता नांदेड रेल्वे डीव्हिजन दक्षिण मध्य रेल्वेशी असणे चुकीचे आहे. नांदेड डीव्हिजन दक्षिण मध्य रेल्वेशी जोडला गेल्याने रेल्वेचे अनेक प्रश्न सोडविण्यासाठी अडचणी निर्माण होतात.
त्यामुळे नांदेड डीव्हिजन ला मध्य रेल्वेशी जोडावे ज्यामुळे कार्यालयीन संपर्क, भाषिक एकता यामुळे प्रवाशांना आणि रेल्वे विभागालाही त्याचा मोठा फायदा होईल. शिवाय या भागातील लोकप्रतिनिधी, सामाजिक कार्यकर्ते, राजकीय पुढारी, विविध संघटना , प्रवाशी आणि सामान्य नागरिकांनीही नांदेड रेल्वे विभाग हा दक्षिण मध्य रेल्वेतुन काढून तो मध्य रेल्वेशी जोडावे अशी मागणी गेल्या अनेक वर्षापासून करत आहे. त्यामुळे संसदेने याबाबतीत गांभीर्याने आणि विकासात्मक दृष्टीने विचार करून नांदेड रेल्वे विभागाला मध्ये रेल्वेशी जोडावे अशी मागणी खा. प्रतापराव पाटील चिखलीकर यांनी केली आहे.
