हजारो ब्रास रेतीसाठ्याकडे दुर्लक्ष केल्याची गुंडेकर यांचा आरोप
हिमायतनगर| पैनगंगा नदीकाठावर असलेल्या दिघी येथील रेती धक्क्यावरून हजारो ब्रास रेतीचा उपसा करून पावसाळ्याच्या तोंडावर गावखरी व शेतशिवारात साठेबाजी करण्यात आली होती. ते सर्व साठे जप्त करून कार्यवाही करावी, रेती घेऊन जाणाऱ्या वाहनांची नोंदणी हिमायतनगरातील सीसीटीव्ही फुटेजद्वारे घेऊन वाहने जप्त करावी. अन्यथा आमरण उपोषण करण्याचा इशारा कट्टर शिवसैनिक तथा सामाजिक कार्यकर्ते राम गुंडेकर यांनी दिला होता. त्यानंतर नदीकाठावरील दिघीच्या अवैद्य रेती साठ्याचा तहसीलदार डी.एन.गायकवाड यांनी पंचनामा केला. मात्र या ठिकाणी अल्प साठे जप्त करून हजारो ब्रास रेतीसाठ्याकडे दुर्लक्ष करून स्वार्थ साधल्या गेल्याचा आरोप तक्रारकर्त्याने केला आहे.
दिघी येथील रेती माफियांनी केलेल्या रेतीच्या साठ्यावर जप्तीची कार्यवाही होताच कर्तव्यदक्ष उपविभागीय अधिकारी जीवराज डापकर यांनी पत्रकारांना दिघी येथील छायाचित्र पाठवून कार्यवाही केली असल्याचे सूचित केले. एवढेच नाहीतर या ठिकाणी झालेल्या कार्यवाहीची माहिती तहसीलदार साहेबांकडून घेण्याचे सांगितले. मात्र दिघी येथे करण्यात आलेल्या कार्यवाहीबाबत तहसीलदारांनी पत्रकारांना २४ तास उलटून गेल्यानंतरही जप्त साठ्याची माहिती दिली नाही. त्यामुळे दिघी येथे जप्त करण्यात आलेल्या रेती साठ्यात मोठे गौडबंगाल असल्याची चर्चा वाळू माफ़ियामध्ये विरोधाभास असलेल्या गोटात सुरु आहे. त्यामुळं कुठं जप्त रेती साठ्याची माहिती देण्यास टाळाटाळ चालविली जात असल्याची शंका उपस्थित होत आहे.
या प्रकारामुळे रेती तस्करांशी महसूलच्या अधिकारी, कर्मचाऱ्यांचे आर्थिक हितसंबंध असल्याच्या शंकेला जागा आहे. असा आरोप तक्रारकर्ते रामभाऊ गुंडेकर यांनी केला आहे. यापुढे दिघी येथील सर्व रेतीसाठ्यावर नियमानुसार कार्यवाही होईल काय..? कार्यवाही नाही झाल्यास साठा केलेल्या शेतमालकांवर व सरकारी जमीनीत साठा असलेल्या ठिकाणाबाबत तलाठी आणि पोलीस पाटलावर कार्यवाही व्हायला पाहिजे अशी मागणी करणार असल्याचे तक्रारकर्त्यानी सांगून रेती माफियांच्या मुसक्या आवळल्या नाहीतर दि.२७ मे पासून तहसील कार्यालयासमोर रेतीमाफियां व त्यांना प्रोत्साहन देणाऱ्या महसूल अधिकारी - कर्मचाऱ्यांच्या विरोधात उपोषण अटळ असल्याचे श्री गुंडेकर म्हणाले.
