हिमायतनगर, अनिल मादसवार| येथील नगरपंचायतच्या सार्वत्रिक निवडणुकीच्या अनुषंगाने आज दि.२८ जुलै २०२२ रोजी चौथ्यांदा आरक्षण सोडत खेळीमेळीच्या वातावरणात जिल्हा पुरवठा नियंत्रण अधिकारी लतीफ पठाण यांच्या अध्यक्षतेखाली फेर आरक्षण सोडतीचा कार्यक्रम संपन्न झाला. यात ०९ प्रभाग महिलांसाठी तर ०८ ठिकाणी पुरुष उमेदवार अशी प्रभाग निहाय आरक्षण मुख्याधिकारी श्यामकांत जाधव यांनी जाहीर केली आहे. यावेळी तहसीलदार श्री अवधाने यांची उपस्थिती होती.
हिमायतनगर ग्रामपंचायतीचे रुपांतर नगरपंचायतीत झाल्यानंतर २०१५ मध्ये निवडणूक झाली होती. त्यांनतर ५ वर्षाचा कार्यकाळ संपल्याने आरक्षण सोडतीच्या कार्यक्रम गेले वर्षी जाहीर झाला होता. त्यानंतर न्यायालयाने ओबीसी आरक्षण रद्द केल्यामुळे हिमायतनगर नगरपंचायतीचे आरक्षण सोडत झाल्यानंतर महिलांसाठी आरक्षण जाहीर झाले. यावर कुणीतरी आक्षेप घेतल्याने दिनांक १५ नोव्हेंबर २०२१ रोजी फेर आरक्षण करण्यात आले होते. मात्र हे आरक्षण चुकीच्या पद्धतीने झाल्यामुळे रद्द करण्यात आले. त्यानुसार दि.१३ जून २०२२ रोजी फेर आरक्षण घेण्यात आले. पुन्हा हे रद्द होऊन ओबीसी आरक्षण लागू झाल्याने आज दि.२८ जुलै रोजी पुन्हा हिमायतनगर येथील पंचायत समितीच्या कै.वसंतराव नाईक सभागृहात फेर आरक्षण सोडतीचा कार्यक्रम जिल्हा पुरवठा नियंत्रण अधिकारी लतीफ पठाण यांच्या अध्यक्षतेखाली, तहसीलदार श्री अवधाने यांच्या उपस्थित संपन्न झाला.
ओबीसी आरक्षण जाहीर झाल्यानंतर न्यायालयाने दिलेलं आदेशानुसार एप्रिल २०२० ते मार्च २०२२ मध्ये कालावधी संपलेल्या ठिकाणच्या निवडणुकांच्या हालचालीला सुरुवात झाली आहे. हिमायतनगर शहराची लोकसंख्या २० हजार २८५ असून, यात नवीन मतदारांची वाढ झालेली आहे. नगरपंचायतीत एकुण १७ सदस्य निवडणूक रिंगणात राहणार असून, सोमवारी सकाळी ११.०० वा. प्रभाग क्रमांक ०१ ते १७ च्या सदस्य पदाच्‍या आरक्षण व सोडतीचा सुधारीत कार्यक्रम नुसार आज आरक्षण सोडत चिमुकल्या बालकांच्या हस्ते चिठी काढल्यानंतर मुख्याधिकारी श्यामकांत जाधव यांनी जाहीर केली.
हिमायतनगर नगरपंचायतीची जाहीर झालेले आरक्षण पुढील प्रमाणे
प्रभाग क्रमांक 01 - नागरिकांचा मागास प्रवर्ग
प्रभाग क्रमांक 02 - सर्वसाधारण (महिला)
प्रभाग क्रमांक 03 - नागरिकांचा मागास प्रवर्ग (महिला)
प्रभाग क्रमांक 04 - नागरिकांचा मागास प्रवर्ग
प्रभाग क्रमांक 05 - सर्वसाधारण
प्रभाग क्रमांक 06 - अनुसूचित जाती (महिला),
प्रभाग क्रमांक 07 - सर्वसाधारण (महिला)
प्रभाग क्रमांक 08 - सर्वसाधारण
प्रभाग क्रमांक 09 - सर्वसाधारण (महिला)
प्रभाग क्रमांक 10 - सर्वसाधारण (महिला)
प्रभाग क्रमांक 11 - सर्वसाधारण
प्रभाग क्रमांक 12 - सर्वसाधारण (महिला),
प्रभाग क्रमांक 13 - सर्वसाधारण
प्रभाग क्रमांक 14 - सर्वसाधारण
प्रभाग क्रमांक 15 - सर्वसाधारण
प्रभाग क्रमांक 16 - नागरिकांचा मागास प्रवर्ग (महिला)
प्रभाग क्रमांक 17 - अनुसूचित जमाती (महिला)
अशी सोडत करण्यात आली असून, यात एकूण ०९ प्रभाग महिलांसाठी तर ०८ ठिकाणी पुरुष उमेदवार निवडणूक रिंगणात उभे राहतील असे सांगण्यात आले आहे. यावेळी कार्यालय अधीक्षक चंद्रशेखर महाजन, माहूर नपचे कार्यालय अधीक्षक वैजनाथ स्वामी, बालाजी माळचापुरे, रमाकांत बाच्छे, रत्नाकर डावरे, मारोती हेंद्रे, विठ्ठल शिंदे, बालाजी हरडपकर, श्यामसुंदर पाटील, संदीप उमरे, विठ्ठल बनसोडे, तमजीतखान, शेख मुख्तार,यांच्यासह शहरातील नागरीक, इच्छुक राजकीय लोकांसह पत्रकारिता क्षेत्रातील अनेकांची उपस्थिती होती.
हिमायतनगर नगरपंचायतीची निवडणूक सप्टेंबर महिन्यात लागण्याची दाट शक्यता वर्तविली जात आहे. यासाठी दिवाळीपर्यंतचा काळ लागेल असेही काहीजण सांगत आहेत. हि बाब लक्षात घेत अनेक इच्छुकांनी गुडघ्याला बाशिंग बांधून आपली उमेदवारी निश्चित करण्यासाठी पक्षश्रेष्टीना साकडे घालत मीच सर्वश्रेष्ठ उमेदवार आहे. असे दाखविण्यासाठी सार्वजनिक कार्यक्रमात उपस्थिती दाखवून नागरिकांची सहानुभूती मिळविण्याचा प्रयत्न सुरु केला आहे. मागील पंचवार्षिक काळात हिमायतनगर शहरात विकास कामाच्या नावाखाली झालेला उमेदवारांचा विकास पाहता जनता हुशार झाली आहे. त्यामुळे प्रमुख राजकीय पक्षातील नेत्यांनी सुद्धा नगरपंचायत आपल्या ताब्यात राहावी यासाठी प्रामाणिक, निर्मळ, निष्कलंक व जनसेवेसाठी पुढे येणाऱ्या सुपरिचित उमेदवारांची निवड करून उमेदवारी दिली तरच पारडे जाड राहील अन्यथा धोबी पछाड होऊन नागरिकांना पटेल तो उमेदवार निवडून देतील असेही मतदारातून बोलले जात आहे.
आता जनतेतून नगराध्यक्ष निवडला जाणार आहे, त्या पदाचे आरक्षण सुटेल कि जनतेतून सर्वाधिक मते घेणारा निवडून येईल हा संभ्रम नागरिकात आहे. दरम्यान दुसऱ्या नगराध्यक्षाचा मान मिळविण्यासाठी धडपडणाऱ्या अनेकांनी विशेष करून येथे उपस्थिती लावली होती. मात्र ज्या प्रभागात आपले प्राबल्य आहे, त्या प्रभागात महिलांना जागा सुटल्याचे लक्षात आल्याने सौभाग्यवतीला निवडणूक रिंगणात आणण्याच्या तयारीत असल्यानं आनंद झाला आहे. तर बायकोला राजकारणात आनु न शकणाऱ्या नेत्यांना दुसऱ्याच्या कुबड्यावर अवलंबून राहावे लागणार आहे.
