तात्काळ विहिरीचे काम केले नाहीतर ग्रामस्थ उपोषणाच्या तयारीत
सरसम ग्रामपंचायती अंतर्गत येणाऱ्या वॉर्ड क्रमांक ४ येथील कोत्तलवाडी गावकऱ्यांसाठी सण २०१९-२० मध्ये पाणी टंचाई आराखडा बैठकीत नरेगा अंतर्गत ७ लक्ष रुपयाचा निधी सिंचन विहिरीसाठी मंजूर झाला होता. त्या निधीतून विहिरीचे खोदकाम फेब्रुवारी महिन्याच्या शेवटच्या हप्त्यात एका खाजगी गुत्तेदारांमार्फत ग्रामसेवक अच्युत जोशी यांनी सुरु करण्यात आले, या विहीरीस काम सुरु असताना पाणी लागलेले होते, या विहिरीस पाणी लागल्याने येथून सरसम बु. येथे पाईपलाईनसाठी २० लाखाचा निधी अभियंता मेकेवाड यांनी मंजूर केला आहे. मात्र विहिरीचे काम पूर्ण न करताच डोहाप्रमाणे विहिरीचे खोदकाम करून तत्कालीन सरपंच व ग्रामसेवक यांनी या कंची पुरती वाट लावली आहे.
एवढेच नाहीतर त्या ठिकाणी निघालेले गौण खनिज विकून खाण्याचा प्रकारही संबंधितांनी करून शासनाच्या मंजूर निधी नरेगाच्या कर्मचाऱ्यांच्या संगनमताने आपल्या घश्यात घातला आहे. परिणामी विहिरीचे बांधकाम केवळ खोदकाम करून अर्धवट राहील्याने विहिरीचे रूपांतर एका डलूमध्ये होऊन मोठ्या प्रमाणात गाळ साचल्याने गावकर्यांना तीव्र पाणी टंचाईचा सामना करावा लागतो आहे.
यास कारणीभूत ग्रामसेवकाचा नाकर्तेपणा व निधीवर डल्ला मारण्याचा प्रकार केल्याचा आरोप गावकर्यांनी व तक्रादारानी केला आहे. त्यामुळे येथील बहुतांश वडार, बंजारा, आदिवासी ग्रामस्थांना आजघडीला तहान भागविण्यासाठी दैनंदिन कामकाज सोडून बैलगाडीन किलो २ किलो मीटरवरून पाणी आणावे लागते आहे. हि बाब हेरून येथील युवकांनी श्रमदानातून विहिरीचा गाळ एकाबाजूला जमा करून पाणी काढण्याचा प्रयत्न केला. परंतु तो अपयशी ठरला आहे. याबाबत अनेकदा ग्रामस्थांनी मागणी करून ग्रामसेवक याकडे जाणीपूर्वक दुर्लक्ष करत आहे.
गावकऱ्यांची तहान भागवणीसाठी मंजूर झालेल्या निधीतून विहिरीचे बांधकाम पूर्ण न करता ग्रामसेवक अच्युत जोशी व तत्कालीन सरपंच, कनिष्ठ अभियंता, कार्यकारी अभियंता यांनी संगनमताने शासन व जनतेच्या डोळ्यात धूळफेक केली आहे. त्यामुळे त्यांना जबाबदार धरून त्यांच्यावर कार्यवाही करावी. आणि तातडीने या विहिरीतील गाळ काढून कठडे बांधले नाहीतर विहीर यंदाच्या पावसाळ्यात नामशेष होण्याच्या मार्गावर आहे. हि बाब लक्षात घेता तत्काळ विहिरीचे बांधकाम पूर्ण करा अन्यथा राम गुंडेकर यांच्यासह गावकरी नागरिक आमरण उपोषण करण्याच्या तयारीत आहेत.
