हिमायतनागर. अनिल मादसवार| भूतलावर स्थूल व सूक्ष्म रूपांत आसुरी शक्ती मोठ्या प्रमाणावर वाढल्या होत्या. त्या शक्तींना नष्ट करण्यासाठी देवतांनी केलेले प्रयत्न असफल झाले. तेव्हा ब्रह्मदेवाच्या आदेशानुसार विविध ठिकाणी वेगवेगळया रूपांत दत्त देवतेला अवतार घ्यावा लागला. त्यानंतर दैत्य नष्ट झाले तेंव्हापासून तो दिवस `दत्तजयंती’ म्हणून साजरी केली जाते असे प्रतिपादन हभप.पुरोहित कांतागुरु वाळके यांनी केले. ते हिमायतनगर येथील पोलीस स्थानक नजीक असलेल्या दक्षिण मुखी मारोती मंदिरात दि.०७ डिसेंबर रोजी श्री दत्त जन्मोत्सव निमित्त आयोजित प्रवचनातून उपस्थितांना मार्गदर्शन करताना बोलत होते.
दरवर्षीप्रमाणे याही वर्षी मार्गशीर्ष पौर्णिमेच्या दिवशी म्हणजे बुधवार ०७ डिसेंबर २०२१ रोजी आलेल्या दत्त जयंती उत्सवाचे आयोजन येथील दक्षिणमुखी मारोती मंदिर कमिटीच्या वतीने करण्यात आले होते. प्रथमतः सकाळी श्री संतोष पळशीकर यांनी सपत्नीक प्रभू दत्तात्रेयाचा अभिषेक महापूजा केली. त्यानंतर भजनाचा कार्यक्रम संपन्न झाला. लागलीच सकाळी ११ वाजता हभप कांतागुरु वाळके यांच्या प्रवचन आयोजित करण्यात आले होते. यावेळी मार्गदर्शन करताना ते म्हणाले कि, सत्य हाच धर्म, असत्य हेच कर्म, याशिवाय धर्म आणि अधर्माचे दुसरे वर्म नाही. मुखाने नामाचे स्मरण केले तरच सदगती प्राप्त होईल, संतांची संगत हाच स्वर्गवास, संताकडे पाठ फिरवणं हाच नरकवास होय.
काम, क्रोध, लोभ, मत्सर जीवनात आवश्यक आहे, मात्र त्याचा लिमिटेड प्रमाणात उपयोग केला पाहिजे नाहीतर मानवी जीवन अधोगतीकडे गेल्याशिवाय राहणार नाही. म्हणून मनुष्याने आपले "हित कशात आहे आणि घात कशात आहे ते ओळखून उचित तेच करावं असे त्यांनी सांगत ब्रह्मा, विष्णू आणि महेश या त्रिदेवांचे स्थान सर्वोच्चपरी आहे. या तिन्ही देवांचे अंश म्हणजेच अवधूत चिंतन श्री गुरुदेव दत्त आहे. असे सांगून ब्रम्हा विष्णू आणि महेश्वर सामोरी बसले... मला हो दत्त गुरु दिसले.... असे म्हणताच १२.३० वाजता भगवान श्री गुरु दत्ताचा जन्मसोहळा मोठ्या उत्सहात पार पडला.
यावेळी उपस्थित महिला मंडळींनी पाळणे म्हणत जन्मोत्सव साजरी केला. त्यानंतर लागलीच पळशीकर दाम्पत्यांनी महाआरती केल्यानंतर महाप्रसादाचे वितरणाच्या उत्सवाची सांगता झाली. यावेळी मंदिर कमिटीचे अध्यक्ष बाळू अण्णा चवरे, उपाध्यक्ष संतोष अप्पा पळशीकर, सचिव शिवअप्पा तुपतेवार, पोलीस निरीक्षक भुसनूर, अमोल बंडेवार, बबनअप्पा बंडेवार, शांतीलाल सेठ, डॉ.देवसरकर, बाळू साखरकर, लक्ष्मीबाई गड्डमवार, जन्नावार बाई, पळशीकर मैडम, बंडेवार काकू, श्याम ठाकूर, ज्योतीताई बेदरकर, अमोल कोटुरवार, ज्ञानेश्वर बास्टेवाड, पोपलवार, तुप्तेवार, चवरे, कोमावार, राठोड, मेरगेवाड, पार्डीकर, मादसवार, जुन्नावार, डॉ.आनंद माने, शंकर पाटील, निकु ठाकूर, ज्ञानेश्वर कात्रे, विठ्ठलराव देशमवाद, विठ्ठलराव फुलके, एकंबेकर, आदींसह मोठ्या प्रमाणात महिला पुरुष भजनी मंडळ, गुरुदेव सेवा मंडळाचे सदस्य आणि महिला मंडळी मोठ्या संख्येने उपस्थित होते.
