नांदेड| स्वातंत्र्याच्या अमृत महोत्सवानिमित्त आज जिल्हा कौशल्य विकास रोजगार व उद्योजगता मार्गदर्शन केंद्र व औद्योगिक प्रशिक्षण संस्था यांच्या संयुक्त विद्यमाने औद्योगिक प्रशिक्षण संस्था नांदेड येथे सुशिक्षित बेरोजगार युवक-युवतींसाठी रोजगार मेळावा संपन्न झाला. विद्यार्थ्यांनी आपल्यातील कौशल्य ओळखून भविष्यातील आवाहनांना सामोरे जावे असे जिल्हा कौशल्य विकास रोजगार व उद्योजगता मार्गदर्शन केंद्राच्या सहाय्यक आयुक्त रेणूका तम्मलवार यांनी मार्गदर्शन करताना सांगितले.
या रोजगार मेळाव्यास खालसा औद्योगिक प्रशिक्षण संस्था नांदेडचे प्राचार्य गुरुबच्चन सिंग, औद्योगिक प्रशिक्षण संस्थेचे प्राचार्य एम.एस. बिरादार, औद्योगिक प्रशिक्षण संस्थेचे उपप्राचार्य एस.एस.परघने, महाव्यवस्थापक प्रविण खडके, जिल्हा उद्योग केंद्राचे सहा. प्रशिक्षणार्थी सल्लागार प्रबंधक सौ. राठोड, खादी ग्रामोद्योग चे एस.बी.रामे यांची उपस्थिती होती. विद्यार्थ्यांनी वाढती बेरोजगारी यावर आजच्या युवक-युवतींनी कशा प्रकारे मात केली पाहिजे यावर मार्गदर्शन करण्यात आले. या रोजगार मेळाव्यात जास्तीतजास्त विद्यार्थ्यांची निवड करुन त्यांची बेरोजगारी दूर व्हावी असे औद्योगिक प्रशिक्षण संस्थेचे प्राचार्य एम. एस. बिरादार यांनी यावेळी सांगितले.
या रोजगार मेळाव्यात एकूण 9 नामांकित कंपन्यानी सहभाग नोंदवला. त्यामध्ये स्पार्क मिंडा मुंबई, फियाट पुणे, धुत ट्रान्समिशन औरंगाबाद, महिंद्रा अँड महिंद्रा पुणे, हेलिकल्स औरंगाबाद, सुझुकी मोटार गुजरात, खादी ग्रामोद्योग तसेच इतर कंपन्याचे प्रतिनिधी देखील उपस्थित होते. महिंद्रा अँड महिंद्रा पुणे या कंपन्यामार्फत एकूण 367 विद्यार्थ्यांची मुलाखत घेवून भरती प्रक्रिया सुरु आहे. या कंपनीसाठी पुढील चार दिवसापर्यंत या कार्यालयाशी संपर्क साधून इच्छूक बेरोजगार उमेदवार आपले नाव नोंदणी करु शकतात असेही प्रसिध्दीपत्रकाद्वारे कळविले आहे.
