नांदेड| राष्ट्रवादी काँग्रेस पक्षाचे अध्यक्ष तथा पद्मविभूषण, माजी केंद्रीय कृषीमंत्री खा. शरदचंद्र पवार हे नांदेडमध्ये येत असून त्यांच्या उपस्थितीत दि. 14 मे रोजी माजी शिक्षणमंत्री कमलकिशोर कदम यांच्या अमृतमहोत्सव सोहळ्याला उपस्थित राहणार आहेत. तसेच पद्मश्री इन्टिट्युट ऑफ मेडिकल सायन्सेस अ‍ॅन्ड रिसर्च सेंटर भुमिपूजन सोहळा त्यांच्या हस्ते पार पडणार आहे. यासह इतरही कार्यक्रम आयोजित केले आहेत, अशी माहिती प्रसिद्धी पत्रकाद्वारे नांदेड राष्ट्रवादी काँग्रेस पार्टीचे शहर जिल्हाध्यक्ष डॉ. सुनील कदम यांनी दिली.
खा. शरदचंद्र पवार यांचे आगमन दि. 14 मे रोजी सकाळी 9.30 वाजता नांदेड विमानतळावर होईल. त्यानंतर 10 वाजता खा. हेमंत पाटील यांच्या गोदावरी अर्बनच्या नांदेड येथील कार्यक्रमाला उपस्थिती असणार आहे. दुपारी 12 वाजता वसमत जि. हिंगोली येथे आ. राजू नवघरे यांनी आयोजित केलेल्या सामुहिक विवाह सोहळ्याला उपस्थित राहणार आहेत. दुपारी 1 वाजता राष्ट्रीय साखर संघाचे अध्यक्ष जयप्रकाश दांडेगावकर यांच्या फार्म हाऊसवर राखीव, दुपारी 2 वाजता नांदेड येथील शासकीय विश्रामगृह येथे आगमन. 2 ते 5 या वेळेत अभ्यांगतासाठी राखीव वेळ असेल.
सायंकाळी 5 वाजता राष्ट्रवादी काँग्रेसचे शहर जिल्हाध्यक्ष डॉ. सुनील श्यामराव कदम व संचालक मंडळाच्या पद्मश्री इन्टिट्युट ऑफ मेडिकल सायन्सेस अ‍ॅन्ड रिसर्च सेंटरच सामाजिक न्याय भवनाजवळ भुमिपूजन सोहळा खा. शरदचंद्रजी पवार यांच्या हस्ते होणार आहे. माजी शिक्षणमंत्री कमलकिशोर कदम यांचा अमृतमहोत्सव सोहळा सायंकाळी 5.30 वाजता मादसवाड इस्टेट नमस्कार चौक म्हाळजा बायपास येथे आयोजित केला आहे. या कार्यक्रमाला खा. शरदचंद्र पवार यांची उपस्थिती असेल. तसेच या अमृतमहोत्सव सोहळ्याला माजी खा. केशवराव धोंडगे, राष्ट्रवादी काँग्रेस पार्टीचे प्रदेशाध्यक्ष तथा राज्याचे जलसंपदा मंत्री जयंत पाटील हे उपस्थित असणार आहेत.
या कार्यक्रमात आभासी पद्धतीने केंद्र सरकारचे भूपृष्ट परिवहन मंत्री नितीन गडकरी हे सहभाग नोंदविणार आहेत. तसेच नांदेडचे पालकमंत्री राज्याचे सार्वजनिक बांधकाम मंत्री अशोकराव चव्हाण यांची विशेष उपस्थिती असणार आहे. प्रमुख पाहुणे म्हणून गृहमंत्री दिलीप वळसे पाटील, नगरविकास मंत्री एकनाथ शिंदे, सार्वजनिक आरोग्य मंत्री राजेश टोपे, सामाजिक न्यायमंत्री धनंजय मुंडे, वैद्यकीय शिक्षण मंत्री अमित देशमुख, सार्वजनिक आरोग्य व रोहयो राज्यमंत्री संजय बनसोडे, ज्येष्ठ पत्रकार मधुकर भावे, एमजीएमचे सचिव अंकुशराव उर्फ बाबुराव कदम यांची उपस्थिती असणार आहे.
याचबरोबर या कार्यक्रमाला खा. प्रताप पाटील चिखलीकर, खा. हेमंत पाटील, खा. फौजिया खान, माजी मंत्री सुर्यकांता पाटील, माजी खा. भास्कराव पाटील खतगावकर यांच्यासह आजी-माजी खासदार, आमदार व लोकप्रतिनिधी यांची या कार्यक्रमाला उपस्थिती असणार आहे, अशी माहिती प्रसिद्धी पत्रकाद्वारे डॉ. सुनील कदम यांनी दिली.
