जखमी व मृतांची संख्या वाढण्याची शक्यता, नवरदेव गंभीर जखमी
भोकर/नांदेड| धर्माबाद येथून परतणीचा कार्यक्रम आटोपून नातेवाईकांसह महिंद्रा मॅक्झिमो व्हॅनमधून गावाकडे पररत असताना समोरून येणार्‍या ट्रकची व्हॅनला भोकर – हिमायतनगर राष्ट्रीय महामार्गावर धडक बसली. सोमवार दिनांक 21 फेब्रुवारी रोजी सायंकाळी ६ च्या सुमारास साई धाब्याजवळ झालेल्या अपघातामुळे नवरीसह सहा जण जागीच ठार झाले असून, नवरदेव नागेश कनेवाड हा गंभीर जखमी झाला आहे. तसेच इतर ५ जण गंभीर जखमी झाल्याचे संगण्यात येत आहे. या महिंद्रा मॅक्झिमोत १२ जण होते असे समजते. यामुळे जखमी व मृतांची संख्या वाढण्याची शक्यता आहे. घटनास्थळी रक्‍ताचा सडा पडल्याचे चित्र दिसून आले आहे.
नांदेड जिल्ह्यातील धर्माबाद तालुक्यातील जारीकोट येथील युवतीचा विवाह तीन दिवसापूर्वी उमरखेड तालुक्यातील साखरा येथील युवकासोबत झाला होता. तीन दिवसापूर्वी विवाह झालेली नववधू माहेरी परतणीचा कार्यक्रम करून सासरी जात असताना महिंद्रा मॅक्झिमो मिनीव्हॅन क्रमांक एम.एच.19 एआर 3219 ला समोरून येणार्‍या ट्रक क्रमांक एम.एच.04 एएल 9955 ची जबर धडक बसली.
झालेल्या या अपघातात सहा जण जागीच ठार झाल्याची घटना सोमवारी सायंकाळी सहा वाजेच्या सुमारास भोकर - हिमायतनगर राष्ट्रीय महामार्गावरील सोमठाणा फाट्याजवळ घडली. अपघातातील जखमींना नांदेड व भोकर येथील शासकीय रुग्णालयात उपचारासाठी दाखल करण्यात आले आहे. ही धडक एवढी जबरदस्त होती की घटनास्थळी रक्‍ताचा सडा पडल्यासारखे चित्र दिसत होते. तर मरण पावलेल्यांचे हात पाय तुटून पडले होते. दोन्ही वाहने रस्त्याच्या खाली गेल्याने जेसीबी मशीनच्या सहाय्याने वाहनांना बाहेर काढण्यात आले.
अपघाताची माहिती समजताच उपविभागीय पोलीस अधिकारी गोपाळ रांजणगावकर, भोकर पोलीस ठाण्याचे पोलीस निरीक्षक विकास पाटील सहाय्यक पोलीस निरीक्षक अनिल कांबळे, पोलीस जमादार पांढरे,जाधव, आदींनी घटनास्थळी धाव घेऊन जखमींना ताबडतोब रुग्णालयात उपचारासाठी पाठवले या कामी सोमठाण गावचे दिलीप देशमुख, राजू बोईनवाड,पांडुरंग गोरठकर,संदीप बोईनवाड, जेसीबी मालक, अजय हाके ,चालक, यांनी शर्तीचे प्रयत्न करून मृत झालेल्याना बाहेर काढण्यासाठी मदत केली. अपघात एवढा भयानक होता की अक्षरशः दोन्ही वाहनाचा चुराडा झाला आहे. आजच्या अपघाताच्या घटनेने संपूर्ण नांदेड व यवतमाळ जिल्हा हादरून गेला आहे.
